Бишкек шаарынын тургундары жана коноктору Жаңы жылдагы эс алуу күндөрүндө тарых музейинде ачылган Рахманкул хандын 100 жылдыгына арналган көргөзмөнү көрө алышат. Көргөзмөдө Рахманкул хандын Памирдеги, андан кийин Пакистандын Гилгит, Түркиянын Ван аймагындагы жашоо-турмушун чагылдырган сүрөттөр, жеке өздүк буюмдары, киийим-кечелери, чет өлкөлөрдүн мамлекет башчыларына жазган каттары коюлган.
Эске салсак, Рахманкул Жапаркул уулу 1946-жылы Ооган кыргыздарынын ханы болуп шайланган. Ал өз учурунда Ооган өкмөтү менен эсептешкен киши болгон. Ал турсун Закир шах өзү сый-урмат көрсөтүп турган адам болгон. Аны Британия өкмөтү да кадырлап турган. Ооган эмири Рахманкул ханга “кариядар”, же “Памир сакчысы” деген атайын наам берген. Ага Ооганстандын Памир тарабындагы чек арасын кайтаруу вазийпасы тапшырылган. Чек арадан кишини өткөрүү, өткөрбөө ишеними ага жүктөлгөн. Рахманкул ханга атайын документ берилип, анда минтип жазылган: "Рахманкул Афгани. Памирдин сакчысы. Бадахшан. Кичи Памир". Анын бул кызматы үчүн Памир кыргыздары салык төлөөдөн бошотулган.
Рахманкул хан 1990-жылы Ван жергесинде дүйнө салган. Ал урпактарын кыргыз мейли Кытайда, Ооганстанда, Түркияда жашайбы, ар дайым өз улутун даңктап, кыргыз тилин сактоого, ата-баба салтын унутпоого чакырган.